呻盟友未能說服自己
梁美芬解釋，某些事件唔需要完全反對，但又未游說到佢贊成，咪投棄權票囉。以高鐵議案為例，佢話自己係西九新動力召集人，呢個組織共有三十名區議員，佢哋內部經過多次激烈討論，最終未有共識；無論佢投贊成或反對票，西九新動力都會面臨分裂危機，所以佢就投咗棄權票。
佢又辯解稱，議會容許以棄權表達意見，有反對、贊成同棄權三個掣選擇，佢對一啲未成熟嘅議案投棄權票，唔覺得有咩問題喎；佢仲話自己出席率好高㗎。
後來，梁美芬終於同我哋講真心話，話大部分棄權票都用喺建制派嘅修訂或動議，事關有時盟友未能說服佢支持，但佢又唔想對盟友投反對票，於是咪用棄權呢種溫和方式表達囉。