政情：田二少黃袍加身歎慢板

自由黨領導層有意喺副主席一層動手術，消息提早曝光後，自由黨高層難免頭痕，事關唔少報道都觸及張宇人同自由黨核心嘅關係發展。張宇人身為飲食界代表，對最低工資等好多敏感議題，立場與近年努力走直選路線嘅自由黨南轅北轍，與黨領導層可謂貌合神離；若然依家跟原來戲軌辭任副主席，無形中等如默認與黨內其他高層同床異夢嘅江湖傳聞。所以，據聞張會留下來，同另一副主席方剛共同進退，短期內不提辭任。

六巨頭開會敲定對策

自由黨六巨頭尋晚聚頭，下午福建社團聯會新會址啟用酒會上，張宇人、方剛同劉健儀、田北辰卻前後腳到場，前二人走後半小時，劉健儀先至到；待劉離開，田北辰才現身，以「腳駁腳」形式捧場，當然係想避開傳媒嘅尷尬追問啦。

壓軸到場嘅田北辰被問到「恨唔恨做自由黨副主席」時話，如果黨友想畀個名分佢，佢唔會拒絕，但一切須跟足黨內程序進行，又指張宇人如果就首個最低工資水平與自由黨立場有異，立法會投票時可申請豁免，唔使卸任副主席咁話。咁講法，即係自由黨高層已經對副主席易將消息外洩敲定對策，一切低調同放慢處理，從而減低事件對自由黨嘅衝擊。

果然，自由黨六巨頭尋晚雖然如期碰頭，商討「有關副主席辭職」嘅事，但並無按原定計劃一錘定音敲定由田北辰晉升副主席，話仍要聽聽黨內意見，即係忽然歎慢板，拖慢田二少嘅黃袍加身。至於張宇人離開管理層一事更加煙消雲散。Miriam話，六人無討論過張宇人辭任副主席，等張宇人自己諗掂佢，Miriam仲叫記者問張宇人本人，可惜嘅係，直至截稿前，張宇人都無回覆我哋，想問清楚都苦無機會。