中環出更：陳氏堂兄弟代言自家品牌
長江製衣創辦人陳瑞球經常慷慨解囊，家底豐厚不在話下，但係佢哋一家人寧願做低調富豪。好似近排球伯大公子、YGM貿易主席陳永奎（Peter）做董事嘅公司，就斥資六千六百萬元購入中半山世紀大廈嘅一個單位，實力雄厚。不過講到衣着，佢哋梗要支持自家品牌，好似球伯次子YGM副主席陳永燊（Samuel），至愛旗下中檔時裝品牌MICHEL RENE。
早前卓妮喺長江製衣同YGM股東會上，見到Peter同Samuel兩兄弟拍住爸爸球伯主持大會，兩兄弟做起嘢嚟有板有眼，球伯大可放心啦！Samuel瞓身支持自家品牌，無論恤衫、西裝同西褲都係MICHEL RENE出品。至於佢條呔係英國高檔名牌Aquascutum，YGM去年底將其亞洲業務收歸旗下。
當日Samuel堂兄全國政協常委陳永棋都喺現場，佢係公司執行董事，笑言自己又肥又矮着唔到自家牌子，但條呔係公司喺內地推出嘅德國牌子OLYMP。卓妮轉頭同Samuel講佢堂兄着唔到自家衫褲嘅苦惱，Samuel聽罷笑稱，棋哥咁樣身形嘅人唔多，如果專為佢設計時裝，股東就唔着數喎。