中環出更：葉劉新裝開封連踩兩酒會
政客論政絕對唔係稀奇事，不過當匯賢智庫立法會議員葉劉淑儀、全國人大常委范徐麗泰，再加埋已故政協常委黃光漢太太周娟娟三個「政經」女人聚頭，除咗國家大事之外，原來都會閒話家常講扮靚心得。尋日葉劉連走兩場，先出席灣仔舉行嘅工商界十‧一酒會，再飛身去天后參加福建社團聯會新會址開幕儀式。雖然趕時間，但佢身上嘅煙花圖案中式上衣去到邊都咁突出。
與「政經」女人談衣着
女人出席正式場合，套裝好似係指定服裝，不過外剛內柔嘅范太就同長褲拍硬檔，至於向來時裝觸覺敏銳嘅葉劉就裙褲都啱，呢排酒會繁多，好多女士都會揀番富中國特色嘅服裝配襯，所以尋日葉劉件中式上衣啱晒dress code，連范太同黃太都要圍埋一齊研究吓。
葉劉睇中咗上海灘呢件煙花衫好耐，不過嫌佢要成三、四千蚊好貴，早排暑假佢陪囡囡去買長衫，咁啱撞正減價，所以葉劉先順便買埋。葉劉收埋咗件衫個幾月，尋日第一次攞出嚟着。葉劉仲話，佢哋三位「政經」人都研究過女士着衫啱場合之餘，舒適都好重要，又話着褲都可以好莊重，唔使一定要着裙，好似美國國務卿希拉妮咁，都成日着褲喎。