中環出更：福建幫新竇搬入北角票倉

福建社團聯會舊會址喺上環，以長期租賃形式設置，一年幾前，福建幫決定豪花近三千萬元，買入呢個位處北角嘅九千幾呎新會址，用二百萬元裝修，地方大四倍，除咗大禮堂，仲有幾間會議室，以後聯會高層同鄉里開會、聚餐、舉行文娛活動、凝聚鄉情，甚至搞選舉誓師大會或者設立臨時拉票總部，都唔驚無地方啦！據悉，新會址才剛啟用，市值已經升兩成，帳面賺近六百萬元，相當和味。

建制派蜂擁拜票

聯會新會址既吸錢又吸票，建制派政黨蜂擁而至，捧場為名，拜票為實，民建聯主席譚耀宗、自由黨主席劉健儀、經濟動力嘅林健鋒（Jeffrey）同梁劉柔芬（Sophie）、匯賢智庫葉劉淑儀等政團頭目由頭坐到落尾，出身福建系嘅「蔡菜子」蔡素玉、中總會長蔡冠深同廠商會立法會代表林大輝亦畀面現身。作為主人家嘅幾位福建幫頭領林樹哲、楊孫西、施子清同盧文端，滿場飛招呼賓客，握手握到手軟。

政府方面，除咗特首同政務司司長外，新聞處處長黃偉綸同民政事務局副局長許曉暉（Florence）都有畀面捧場，Florence前日喺《城市論壇》以請飲嘢同甜美笑容溶化一班「維園阿哥」，被班阿哥讚仲靚過未做副局長之前。Jeffrey同Sophie尋日一見Florence，意有所指咁大讚Florence「真係靚咗好多喎」，搞到Florence一味傻笑，唔識反應。

許曉暉（右）畀林健鋒（左）同梁劉柔芬「讚」靚女，有點不知所措。	楊孫西（右）同蔡素玉（左）都係福建人，大家同聲同氣。	自由黨副主席方剛（前右）同張宇人（後）都嚟拜票。
廠商會立會議員林大輝畀面捧場。

卓妮