廣華驗眼疑篤盲女病人
病人因發冷到廣華醫院求診，未料卻失明而歸！一名婦人留院接受檢查，期間懷疑被醫生以物件「篤」盲右眼，但院方回應事件時，卻對當日檢查情況隻字不提，更於事發後一個月才轉介病人前往眼科專科接受跟進治療。立法會議員直指院方迴避問題有掩飾過錯之嫌，促徹查事件再向病人交代。
五十多歲的梁女士在護老院任職護理員，身體尚算健壯，只是近年時有腰背痛及視力模糊。今年三月底，梁因發冷及嘔吐到廣華醫院急症室求診，被安排入住內科病房，梁指當晚有數名醫生為其檢查眼睛，期間突然被一尖銳物件刺中右眼，梁頓時眼前一黑。
「即刻痛到彈起」
「檢查嗰陣有兩個醫生話我隻眼冇事，另一個醫生就走埋嚟話『睇過，咪呢度囉』，跟手就『篤』落隻眼度，我即刻痛到彈起！」梁指醫生立時詢問能否看見眼前事物，又指她患有糖尿病，肝臟長有膿瘡，「佢哋（醫生）話醫番好個肝，隻眼自然會睇得番嘢，我乜都唔識，梗係信醫生啦！」然而，住院將近一個月，梁的右眼仍未見起色，紅腫加劇，「入院前我隻眼明明好地地，點解畀佢（醫生）『篤』完就睇唔到嘢？」
一夜之間驟變失明，更失去工作能力，梁於出院後即時向醫院管理局投訴，但廣華醫院的覆函中，卻對該院醫生曾為梁檢查眼睛之事隻字不提，質疑有所隱瞞，「佢哋一隻字都冇提過有醫生同我驗過眼，又冇講點解隻眼無端端發炎！唔通佢哋真係『篤』盲我隻眼唔敢認？」
立法會衞生事務委員會委員陳克勤質疑院方迴避問題，容易令人揣測當中是否涉及醫療事故，「如果真係病理原因導致病人失明，點解唔直接講？好似唔見得光咁？」陳認為當局有責任澄清事件，同時向病人解釋病情，令事主有據可依，「白紙黑字解釋清楚，如果事主唔接受，都可以攞住啲資料問其他專家，到時當面對質！」
未回應延誤轉介
廣華醫院發言人稱，梁入院第一天血小板嚴重減少，翌日因出現敗血性休克而被送往深切治療部，證實患上肝臟膿瘡，需進行皮下引流手術治療。梁住院期間表示右眼痛楚，該院曾安排眼科醫生與梁會診，待病情穩定後，再安排病人轉往明愛醫院眼科跟進，但就延誤轉介一事未有回應。發言人又強調，梁右眼患有內生性眼內炎，並非由普通眼科檢查或眼部接觸所能導致。
內生性眼內炎致盲機會低
香港執業眼科醫生會會長周伯展解釋，內生性眼內炎屬於非外來細菌感染，而是身體內發作的炎症，主要分為葡萄膜或視網膜發炎，病人眼部會出現紅腫、痛、矇等症狀。倘病人患有免疫系統疾病，如糖尿病、紅斑狼瘡症等，或身體內出現其他發炎徵狀，細菌有機會透過血液傳送至眼球，患上內生性眼內炎的風險亦較高。
至於因內生性眼內炎而導致突然失明的問題，周指機會較低，「除非病人隻眼嘅眼壓突然飆升，或者血管突然塞咗，先有機會一下子睇唔到嘢。」周又稱，導致眼部受傷應與猛烈外來刺激有關，否則透過接觸而出現突發性失明的機會亦較微。
記者 蕭智湲