政情：區會團訪台條條fing

自從港府今年四月成立所謂高層次嘅港台經濟文化合作協進會後，已為港台正式溝通打開缺口，港府官員以至政黨代表可透過台灣對口單位台港經濟文化合作策進會，加強與台灣交流，可惜港府對訪台依然驚驚青青好被動。好似早前鬍鬚曾以協進會榮譽主席訪台，行程滴水不漏，要台灣媒體踢爆之後，港府先至公布佢訪台日期，但估唔到今次區議會主席訪台都一樣咁鬼祟。

據聞，早有盤算嘅德成局長六月率領十八區區議會正、副主席到上海參觀世博期間，已向主席們預告話，希望以區議會名義訪問台灣，大家都好認同。點知搞咗咁耐，德成局長幾日前才向主席們簡介訪台行程，但所謂嘅行程，都係簡單交代話會考察當地社區、文化及體育設施，好似到台北參觀文山運動中心、華山一九一四創意文化園區及剝皮寮歷史街道、士林夜市等，而到台中就會去孔廟及地震後重建嘅東勢鎮。

不過，考察都係其次，見到乜嘢重量級人物先至係戲肉，偏偏德成局長就懶神秘，搞到成班主席蒙在鼓裏。正所謂「一朝被蛇咬，十年怕草繩」，月前鬍鬚曾訪台，原本安排與行政院院長吳敦義會面，點知對方後來話忙於視察颱風防災工作，抽唔到時間見鬍鬚曾，結果瘀爆收場。所以今次區議會主席同邊個重量級人物見面，德成局長把口密不透風，即使知道都唔敢講住，避免步鬍鬚曾後塵。

一波三折 賣甩副主席

其實今次區議會主席訪台一波三折，據聞德成局長去年四月赴台參加世界佛教論壇時，已為今年鬍鬚曾和區議會主席訪台拉線，原定安排區議會主席今年五月訪台，但因為鬍鬚曾訪台有阻滯，累及區議會主席押後，搞到至今才成行。據了解，原本區議會副主席都有份隨行，但最後唔知點解取消咗，結果一眾副主席大失所望，港府亦啞口無言，解釋唔到原因。

鬍鬚曾月前訪台搞到甩轆，今次區議會主席訪台亦搞到條條fing；睇嚟港台要加強溝通，似乎都好唔容易！