政情：Tim霍高招 借范太甩身
政府今日公布申辦亞運諮詢文件，身兼臨時申辦委員會副主席嘅港協暨奧委會會長霍震霆（Tim霍）尋日出席一個十．一酒會時成為焦點。眼見畀傳媒「圍攻」，Tim霍即時借全國人大常委范徐麗泰甩身，大家問佢近排有咩忙時，佢竟然失驚無神爆咗句：「啱啱同范太講咗聲生日快樂囉！」原來尋日係范太六十五歲生日，Tim霍一句話，成功將眾人視線轉移到范太身上，高招！
雖則被Tim霍借嚟甩身，但尋日牛一嘅范太心情大好，仲恤咗個靚髮，但就呻天公不作美，希望天晴時可以補番「三老遊」，同佢奶奶、姑仔暢遊海洋公園。講到生日願望，佢話希望全部人都開心快樂：「咩都假，身體健康最重要！」
話說回頭，Tim霍雖然一度甩身，但一眾傳媒都無放過佢，繼續窮追猛打叫佢講申辦亞運嘅事。