政情：張永明離任 未有接棒人
中學文憑考試仍未正式推出，但一手培育呢個新考試嘅考評局秘書長張永明，尋日突然宣布十二月十五日約滿後不續任，理由係抽多啲時間陪屋企人。一直與張永明並肩作戰嘅考評局主席吳克儉，讚揚張永明對考評局雙倍付出，估計唔續任係張永明一生中「好痛苦嘅決定」，教育局局長孫明揚亦祝願他日後生活愉快。
唔經唔覺張永明喺考評局做咗六年，吳克儉爆料話張永明今年三月提出不續任，「大家為呢件事好煩躁，用幾個月時間游說張博士」，但唔成功。
考評局已成立秘書長遴選委員會，委託全球頂尖顧問公司進行全球招聘，現已進入收集名單階段，但暫未有接任時間表，即係仲未搵到繼任人。吳克儉話，考評局董事會要求繼任人要有領導才能和熟悉本港，但無規定要係香港人，估計獵頭工作兩至三個月內完成。不過考評局已作兩手準備，張永明離任後，仲會出任考評局高級顧問，而副秘書長卜俊智就做署理秘書長。