政情：自由黨搞遊行 為選舉鋪路？
自由黨尋日聯同地產代理業界大聯盟遊行，要求特首選舉委員會增設地產代理界別。佢哋立場明顯向商界傾斜，而且明知選舉委員會唔會增加新界別嘅情況下仍提出新增界別，莫非佢哋如意算盤係爭取佢哋嘅支持，將來留待選舉時發揮效用？
由四個地產代理商會組成嘅大聯盟尋日發起遊行，黨主席劉健儀慷慨陳詞話，下屆選舉委員會由八百人增至一千二百人，政府絕對應該亦絕對有空間喺新增加嘅四百人中，撥一啲畀地產代理業界。田二少更不遺餘力大讚地產代理喺中小企中屬代表性行業，呼籲大家要團結一致，令大家情緒升溫，遊行隊伍不斷叫好。喺政治上，「成功爭取」當然好，就算爭取不成功，出過一分力，都係有目共睹嘅。
尋日有消息傳出，話公民黨湯家驊有意出選西貢區議會嘅日出康城選區，挑戰一早就喺呢區經營嘅自由黨方國珊，如果係真，佢選區議會超級議席嘅動機就好明顯。方國珊想提醒居民：小心啲人追女仔，追到其實又吼住另外一樣嘢。