政情：孫大倫獲頒榮譽院士親家撐場
城大尋日頒授榮譽院士，雖然遇啱颱風「凡亞比」襲港，但前來撐場嘅政商界名人誠意不減，廣東社團總會主席王國強、城大校董會成員胡曉明都現身撐場。四位榮譽院士之一嘅中港照相器材集團主席孫大倫（Dennis）最威水，除咗太太孫鄧秀英拉大隊祝賀，親家康文署副署長鍾嶺海同身為旅遊事務助理專員嘅太太鍾麥雪梅都雙雙捧場，相當有面子。
Dennis近排喜事連連，上個月啱啱同G2000老闆田北辰、偉易達主席黃子欣等城中名人齊過六十大壽，依家又首次獲本港大學頒授榮譽院士頭銜，真係可喜可賀。尋日大仔因離港工作冇嚟到，新抱仔Jacqueline就同奶奶、叔仔現身撐場，新抱嘅一對高官父母亦到賀。
今次獲得榮譽院士嘅傑出人士仲有拔萃女書院校長劉靳麗娟、新科實業（香港）主席梁少康同突破機構總幹事梁永泰。咁開心嘅時刻梗少不了家人支持，除咗Dennis，劉太家人都扶老攜幼見證呢一刻。