政情：袁彌明區選狙擊甘威
白鴿黨喺政改一役之後，至今依然大把人追住佢哋算帳。早前電台主持「快必」、「慢必」、社運人士「星屑醫生」歐陽英傑同前港姐袁彌明等人，成立咗一個新組織「選民力量」，打正旗號狙擊白鴿黨，勢要佢哋喺下屆區議會選舉「票債票償」，據聞佢哋仲打算派喺娛圈出名寸嘴、鬧盡賤男港女嘅袁彌明，落中西區力撼當區白鴿黨區議員甘乃威。係人都知甘威去年受盡女助理事件困擾，如果真係畀袁彌明狙擊嘅話，到時肯定畀人執住單醜聞嚟打，都咪話唔甘囉！
自嘲形象負面礙選情
「選民力量」成員就話，佢哋志在破壞泛民協調機制，事關喺呢個機制下，泛民黨派有志出選嘅人都要「論資排輩」，各位「大佬」做開繼續有得做，做細嘅就苦無出路，唔少選區都淪為白鴿黨同民記之爭，選民往往要作「兩害取其輕」嘅無奈選擇。「選民力量」希望喺呢兩個月內吸納至少四十名會員，計劃喺嚟緊區選傾巢落區，話就話想畀選民多一個選擇，其實係狙擊白鴿黨。據聞現時至少有十幾人報名參選，包括知名度較高嘅「星屑醫生」、「快必」、「慢必」同袁彌明。
極有可能「落中西，撼甘威」嘅袁彌明，其敢言風格出晒名，作風仲好激，早前試過扮裸體衝上政府總部抗議。袁彌明尋日就自爆不嬲有興趣從政，只係搵唔啱一個適合政黨，佢又強調從未投票畀「出賣民主」嘅白鴿黨：「對於所有無誠信嘅人，我都杯葛㗎；娛樂圈有啲女星整完容又唔認嘅，我一定照鬧！」佢大呻自己知名度雖然較高，但因為經常鬧藝人，形象負面，未必有利選情，仲擔心涉足政治令佢更難接job添。
社民連前主席黃毓民同該黨行委任亮憲尋日現身撐場。毓民話自己○七年做社民連主席時，已反對泛民協調機制，但當時同白鴿黨關係無依家咁惡劣先無反枱。社民連本身都有參與協調機制，所以仲做緊該黨行委嘅任亮憲就避嫌唔同「選民力量」一齊影大合照，但佢尋日咁高調現身，已經同緊個黨唱反調啦。
不過，身為被狙擊對象嘅白鴿黨主席何俊仁，就暗批「選民力量」嘅行徑同建制派無異：「以前選舉時都有左派出嚟扮民主派參選，目的就係想
票，『選民力量』咁做同佢哋冇乜分別啫。」鐵頭仁話「選民力量」肯定會分薄白鴿黨票源，最後令民建聯漁人得利，但自己已有晒準備應戰咁話喎。