中環出更：陳欽杰潮着Givenchy西裝
Moiselle慕詩國際主席陳欽杰（Boby）身在潮流界，潮流觸覺梗要時刻保持敏銳。早前卓妮喺慕詩股東周年大會上，見佢着住套Givenchy黑色修身西裝，配襯佢至愛嘅Dolce & Gabbana時尚領呔，打扮得官仔骨骨。Boby笑笑口話，出席咁正式嘅場合梗要執到正啦！
男士嘅正裝通常係黑、藍、灰為主，Boby貴為上市公司主席，平時着衫除咗要追款之外，都要保持莊重形象，所以揀色唔會太花巧。當日佢着住嘅法國品牌Givenchy西裝都係黑色，但啱身剪裁就盡顯設計心思，能夠將黑色帶嚟嘅悶氣一掃而空。
男人錢難搵 冇心撈過界
Boby一向係意大利品牌D & G嘅擁躉，貪佢夠時尚，設計又啱心意。D & G品牌形象以熱情、華麗見稱，甚受男士歡迎，呢個牌子嘅領呔配飾亦係精心之作，當日Boby揀咗條藍色絲質靚呔，屬穩陣之選。卓妮見佢咁貪靚，忍唔住問佢慕詩有冇打算做埋男裝，呻過話男人錢難搵嘅Boby都係冇心撈過界，話：「有機會先啦！」
