中環出更：名人二代活出香港精神
何謂香港精神代表？三位名人二代早前發起尋覓香港精神「真身」，七位「香港精神大使」尋日誕生，各人上台細訴人生旅途上如何創造出無限可能，一字一淚，聽到台下嘉賓眼濕濕。香港人重親情，嚟緊中秋節，三位搞手陳仲尼（Rock）、劉鳴煒、梁宏正都話陪家人過節大過天。愛錫親人，都係香港精神嘅最佳體現。
身兼華人置業集團董事嘅劉鳴煒，尋日以「香港精神大使」活動召集人身份主禮，活動發起人、新鮮出爐嘅全國青聯副主席Rock陳，同立法會議員梁君彥公子梁宏正都有現身。
今次選舉反應出奇熱烈，劉鳴煒話，估唔到香港呢個小城市，隱藏咁多鮮為人知嘅動人故事。唔少得獎者其實熟口熟面，包括喺八仙嶺山火中燒傷嘅張潤衡，衡仔被大火奪去俊朗面孔，仍勇於面對奇異眼光，依家做緊心理培訓導師及輔導員，又係教育學院博士研究生，好叻仔。
女將都唔輸蝕，現職高級消防隊長嘅胡麗芳都有份攞獎。原來佢出世只有三磅，自幼體弱多病，估唔到長大後膽識過人，仲衝入烈火熊熊嘅火場救人；咁英勇，難怪消防處處長盧振雄都嚟為佢打氣。
阿Rock聽得獎人梁欣欣講奮鬥經歷時，感動到流淚。欣欣出世時因腦部缺氧，導致四肢關節唔靈活，曾經係「三無」人士，即係無健康、無學業、無職業，憑着鬥志考入大學設計系，終於成為設計師及視覺藝術工作者。
台上得獎者位位係超人，四叔李兆基公子李家誠同著名建築師呂元祥公子呂慶耀都嚟加油，兩人原來係活動發起會員之一，認真有心。
阿Rock陪家人過節大過天
講番中秋節點過，阿Rock話，難忘兒時爸爸帶佢去淺水灣海灘賞月砌城堡。為應節，點都會食月餅，但揀迷你月餅，淺嘗輒止就夠嘞。中秋當日，佢會陪爸爸媽咪食飯，兩個仔同太太都舉腳贊成。
劉鳴煒今日起程往內地公幹，但中秋佳節當日，點都會趕返香港，陪太太及仔女曬月光。出名錫太太嘅梁宏正，當然係陪家人過節喇。金管局總裁陳德霖就自爆食月餅好挑剔，只食蓮蓉，唔食蛋黃喎。
卓妮