政情：克勤仔自爆中秋煲蠟
一年容易又中秋，民建聯立法會議員陳克勤尋日話，小時候中秋最鍾意同朋友仔匿喺後樓梯煲蠟。吓，煲蠟咁危險？克勤仔解釋，細個屋企環境唔係咁好，即使中秋節都唔會特別慶祝，所以最多都係同朋友玩煲蠟。雖然煲蠟係唔啱，但克勤仔細個都算玩得有品，煲完之後會小心清理地方，唔會搞到周圍一撻撻。
克勤仔仲話，因為家庭環境唔好，所以會將煲完嘅蠟剷起玩多幾次，直至完全玩唔到為止。佢寄語小朋友，以前因為物質生活冇咁豐富，冇得選擇下先會煲蠟，既然依家咁多嘢可以玩，都係盡量唔玩呢種危險遊戲好啲。其實煲蠟會搶火，隨時燒爛塊面，所以千祈唔好學。
克勤仔呢排忙到暈，除咗喺自己地頭新界東派發工作報告畀選民外，嚟緊仲要出席多個地區慶中秋活動，最忙要一晚走六場添，都咪話唔辛苦。不過幸好中秋節有時間同家人食餐飯，之前幾辛苦都冇所謂啦！