政情：潘潔裝太陽能熱水爐
環境局副局長潘潔做咗副局長之後，都要身體力行做個環保先鋒。最近佢使咗萬幾蚊喺屋企裝咗部太陽能熱水爐，每個月慳番五百幾蚊石油氣費用，所以計番條數大概兩年就可以回本嘞！之不過個熱水爐體積都唔細，唔係人人可以用呢個方法追上過低碳生活嘅潮流。
潘副局長最近成日同人講起呢件事，仲提供圖片畀我哋。由圖片睇嚟，部圓筒形熱水爐儲水量應該足夠四、五個人沖涼。由於部熱水爐有番咁上下重量，所以需要起個支架托起佢，睇嚟都幾大陣仗。
潘潔話，佢咁做係為咗響應低碳生活。原本佢屋企一個月要用三罐石油氣，依家只需一罐就搞掂，每個月慳番五百幾蚊，所以部熱水爐雖然要萬幾蚊，但計番條數，約莫兩年就可以回本。
聽落呢個環保行動好似幾跟得過，但係由於個爐要裝喺屋頂吸收太陽能，所以唔係有心就做得環保戰士㗎，住喺普通大廈或者公屋嘅廣大市民就唔得嘞。