政情：莎姐赴德幫耳仔「滅蟲」
自由黨前副主席周梁淑怡同老公周明權拍拖暢遊美歐個半月，今個月初先至返港。呢趟節目好精彩，包括同學敍舊、參加朋友婚禮、醫治耳鳴舊患同埋旅遊購物，兩公婆舒舒服服歎世界，難怪莎姐望落咁精神！
莎姐話，佢同老公七月尾出發去三藩市，參加聖保羅男女校舊生聚會，然後飛去倫敦參加世姪女婚禮，莎姐兩位囡囡都專程飛去同佢哋會合，一家人開開心心放咗幾日暑假，之後佢同老公繼續行程。
跟住落嚟係今次嘅重頭戲，去德國慕尼黑睇醫生。莎姐話約三年前開始覺得耳鳴，好似成日有蟲仔喺耳邊飛，試過喺香港搵中西醫解救都冇進展，於是就透過喺澳洲做醫生嘅老公弟婦介紹，不惜千里去德國搵呢位以雷射醫治痛症嘅名醫。經過兩星期醫治，情況有顯著改善，莎姐話隻蟲仔已經由大蟲變細蟲，或者時有時冇，對高頻嘅聽力亦都提高咗五至十分貝。效果咁好，莎姐即時訂購一部迷你雷射器，喺屋企隨時「滅蟲」。
返港前莎姐兩公婆又點少得去米蘭朝聖呢？但莎姐話，佢只係買咗Prada等四件名牌，唔敢使太多錢，話要留番啲錢用嚟睇醫生喎！