政情：「公投」兩子難返帳委會
五區「總辭」曲終人散，但留低一堆爛攤子唔知點收科，除咗搞到泛民內部六國大封相，仲打亂晒立法會內嘅分工。五子年初辭職時已經預咗順利當選，所以全部立法會事務，都搵咗其他泛民議員幫手「戥腳」，諗住選番入去再接手。不過社民連長毛梁國雄想返入雷曼同梁展文調查委員會，參與寫調查報告嘅工作，已經畀建制派諸多留難，嚟緊復會，建制陣營已經度緊橋，唔畀五子重返重要嘅委員會。要換人，揸正嚟做，選過先囉。
好似公民黨梁家傑（袋巾傑）同社民連黃毓民咁，之前係立法會其中一個常設委員會、政府帳目委員會嘅成員，臨走前就分別搵咗兩名友好議員做替工，諗住返嚟就交換位置，重新掌舵。帳委會內泛民同建制派分工一向分明，第一次換人建制派都順利放行，不過公、社兩黨自編自導自演辭職再選後，建制派完全係大條道理唔合作，所以袋巾傑同毓民想返入帳委會？冇咁易！
IQ博士唔睇好
根據公、社兩黨嘅如意算盤，係等帳委會完成手頭嘅報告，替工就會辭職轉人，之但係唔少泛民中人都收到風，如果再由袋巾傑同毓民選帳委會，建制派一定搵人出嚟爭。帳委會委員全部都要經內務委員會投票大多數贊成通過，以依家立法會嘅勢力分布，一有競爭分分鐘泛民代表驟減。所以泛民惟有按兵不動，睇吓有冇機會扭轉劣勢，如果十月復會都搞唔掂，惟有兩個「替工」一路做埋落去。
到底「公投」兩子有冇運行呢？帳委會主席黃宜弘（IQ博士）就打晒開口牌，話當日做「替工」嘅議員接受任命時，係應承一路做到尾，唔係做半年又收檔，如果忽然又話要辭職畀番舊人做，肯定會有人唔高興。IQ博士仲擺明車馬咁話：「就算真係辭職再選過，都未必再係以前嗰兩位返入嚟！」睇嚟兩位替工都要有定心理準備開OT嘞！