中環耳目：彭少衍三軍會歎池景午餐
衍生行係中港知名嘅品牌管理王國，旗下產品廣告日日喺公仔箱播不停，唔使問都知生意愈做愈旺。日前卓妮見到衍生行董事總經理兼博愛醫院總理彭少衍，同太太Carman拍拖去佐敦嘅三軍會會所食午飯，兩人叫咗蒸魚同埋青菜，雖然簡單但有會所嘅泳池園景送飯，山珍海味都比不上。
三軍會原為駐港英國軍官遊樂會所，依家係提供多國菜式同休閒設施嘅私人會所。當日彭生叫咗至愛嘅番茄碎蒸黃立䱽伴豆腐同埋幾碟唔同款式嘅蔬菜，已經食到好開心。女人天生愛甜品，餐後Carman叫咗個熱騰騰嘅Apple Crumble，香脆又美味，仲直呼可以當餐後水果食添！
進軍本港零售市場
衍生行去年營業額已破兩億元，彭生乘勝追擊，月前喺元朗開咗間「生活源」直銷中心，正式進軍本港零售市場。咁仲未夠，好快又攻入馬來西亞同埋台灣市場，難怪佢話今年係公司發展嘅重要里程碑。
