中環出更：陳細潔變身金公主催運
「鯊魚女」陳細潔（Abby）形象百變，去親Ball，往往成為眾人焦點。雖然係「潮人」，原來Abby篤信風水命理，呢排聽玄學家朋友指點，多着金色有助提升運勢，早前以保良局總理身份出席慈善騷，就變身做金公主。
桃花勁旺 感情隨緣
Abby輕撫髮絲，話畀卓妮知佢染咗一頭金髮，咁至襯番購自Chloe嘅金色背心短裙，加埋一條Moschino金色外套同金色D & G小手袋，光芒四射。但金色幾蝦人着，亂襯一通，好易娘爆。Abby就教路揀淺金色，感覺不落俗套。佢仲將寫字樓轉埋look，喺自己間房換上金色布置，希望招來好運。
咁桃花呢？Abby就話隨緣，事關佢命格勁旺桃花，就算去到六十幾歲依然會有大把人追，但桃花多好易令佢分心，阻礙事業，所以Abby都係講金唔講心嘞。