中環出更：梁卓偉露兩手琴鍵展激情
食物及衞生局副局長梁卓偉（Gabriel）一向有「兩頂帽」，從政以外，仲係業餘指揮家，尋晚為慈善露兩手，表演彈奏匈牙利舞曲，仲為另一位醫生伴奏，彈奏一曲《You Raise Me Up》，全場掌聲雷動。
香港醫學組織聯會尋晚喺演藝學院舉行籌款音樂會，請嚟多位著名演奏家，將《梁祝》協奏曲演繹到出神入化嘅西崎崇子都有份表演首本名曲，琴聲繞樑三日，令人聽出耳油。
Gabriel都唔失禮，十指喺琴鍵間飛舞，頗有大師風範。無他，四歲就學鋼琴同指揮嘅Gabriel，音樂細胞十足，媽媽喺政府學校教音樂，耳濡目染下，音樂造詣有番咁上下，尋日為一位醫生伴奏三首曲，自己再彈多幾首歌，過足表演癮，與大師同場較量，Gabriel話信心十足，事前亦只係約略綵排吓，睇嚟Gabriel第日唔做官，變身演奏家都一定搵到飯食。
方道生畀人擺上枱
大會曾傳出消息，話有份治療梁頌學（Jason）嘅屯門醫院腦外科部門主管方道生醫生有份上台唱歌，方醫生嚟到卻坐喺台下，佢笑騎騎話：「我邊有份（上台），我都唔識。」莫非係畀人擺上枱？不過方醫生都鍾意聽古典音樂，佢話不同曲目總有觸動人心之處，冇話特別鍾情某位音樂家。
方醫生係鐵人，中秋節都唔放假，佢話有班東南亞腦科醫生過兩日嚟香港交流，要做東道主招呼賓客喎。卓妮轉頭撞見身為家庭醫學科醫生嘅馬會大董李國棟同埋太太嚟聽歌，不論古典曲或流行曲，兩公婆都話係「飛佛」，李醫生靜雞雞話畀卓妮知，佢仲係歌星鄭秀文粉絲添。
卓妮