政情：陳易希遲畢業有內情
「星之子」陳易希讀完中五之後，預科都未讀，就畀科技大學破格取錄佢升讀電子及計算機工程系，轉眼已經過咗四年，本來只要讀一年預備班加三年學士課程就完成大學學位嘅陳易希，因為成日要參加比賽同做研究，又想讀多啲副修科目充實自己，結果要讀多一個學期先至畢業。不過聽聞佢成績唔錯，而且比起佢同齡嘅學生嚟講，亦叫做快咗半年大學畢業，總算有個交代。
陳易希咁多搞作，又真係無咩時間讀書嘅，佢最近就打算做「飛人」，參加十月喺西九直升機場舉行嘅全港首個飛行大賽。據聞今次比賽有四十幾隊人馬入圍參賽，要自製各種創意飛行器，由離海面六米高嘅跑道助跑，振翅一飛衝落維港，陳易希依家忙於整架飛得又遠又耐嘅飛行器參賽，既可以學以致用，又可以發揮創意，真係一舉兩得！
陳易希尋日喺百忙中抽時間幫科大開放日演講，大賣口乖多謝科大破格取錄佢，又畀咁多彈性同空間佢去比賽同做研究，佢才有個咁精彩充實嘅大學生活。至於大學畢業之後何去何從，佢就話暫時未決定，但多數會繼續做研究，發揮專長，大家不妨拭目以待。