政情：葉澍堃妙論退休準備
前經濟發展及勞工局局長葉澍堃（Stephen）退休已有三年幾，除咗揸旗幫「小母牛」籌款外，仲做埋馬會大董，更因為識飲識食變身「新食神」，成為美食生招牌，揭開生活新一頁。Stephen尋日出席一個強積金講座時教路，要退休生活多姿多采，就要及早安排退休計劃，首先供滿層樓，無後顧之憂；其次就係準備好子女教育開支，仲話唔好旨意仔女供養父母喎。
有人話退休有三項條件，要有老本、老伴及老友，Stephen就認為有「老本」最重要。佢話搞掂層樓同子女教育開支後，仲要識得投資，乜都係「低買高賣」先有錢賺，佢搞爛gag話：「千祈唔好高買，犯法㗎！」Stephen已成功兼備老本同老伴，老友又點呢？佢坦言呢個世界好現實，以前做官好多人同你做朋友，退休後就減少咗好多，但亦認清邊啲係真正老友！
Stephen講笑話：「好似我咁鍾意飲酒同食嘢，咪識多啲酒肉朋友囉，鍾意打麻雀就識多啲雀友。」Stephen又話，退休前曾經諗過邊度定居最合適，諗諗吓都係香港最好，因為港人日日鬧政府都得，無人阻你，而且醫療福利又好，無屋住又有公屋提供，相比之下，內地窮人就慘得多。