中環出更：陳家強念舊 撐專資會誌慶
香港專業及資深行政人員協會（專資會）今年三月換屆後，前晚又喺跑馬地馬會會所舉行邁向五周年誌慶晚宴，除咗特首出席外，有份創會嘅榮譽顧問、財經事務及庫務局局長陳家強都帶埋老婆返「娘家」湊熱鬧。雖然陳家強由科大教授轉職官場，但佢一直力撐專資會，去年初為專資會主講金融海嘯嘅影響，之後又參加協會嘅政改論壇，認真念舊。
晚宴稱為「邁向五周年誌慶」，有着濃厚嘅誓師意味，希望未來工作做得更好，專資會領導層成員踴躍出席，包括會長胡曉明（Herman）、創會會長容永祺、常務副會長謝偉銓、副會長林大輝、理事陳茂波及「IT豪」譚偉豪等。Herman對專資會發展滿腹大計，致力於體育工作嘅佢話，嚟緊十一月會搞個四十人亞運團，到廣州欣賞亞運賽事，為香港運動員打氣。
大輝愛駒 東瀛出賽
同樣愛好運動嘅林大輝，佢匹愛駒「極奇妙」下周四會空運到日本，準備參加下月三日舉行嘅短途馬錦標一級賽，大輝就會喺三十日出發到日本。極奇妙原本喺今年三月有機會出戰日本高松宮紀念盃，但因為結伴出賽嘅同廐馬王「蓮華生輝」絞腸痧，所以共同進退一齊取消參賽。今次極奇妙有望順利出征，大輝仍然大呻使費乸脷，但為咗興趣無辦法啦！