政情：KK自爆沉迷facebook
喺一年前相信大家都無諗過可以同議員成為「朋友」，更加估唔到可以將自己嘅想法直截了當咁向對方發表。社交網站facebook嘅興起無疑令大家同議員嘅距離拉近，但並唔係個個議員都真係識運用呢個平台。加入facebook已經大半年嘅民協馮檢基（KK），尋日就喺網站為自己做咗個中期檢討，笑言自己本係「電腦盲」，近月透過facebook跟進咗唔同個案、識咗唔少新朋友，仲話搞到自己家吓晚晚上facebook上到兩三點，唔上唔安落添！
原來KK年半前連電郵都唔識用，佢班助理因為睇唔過眼佢只靠傳真同電話過日子，於是就勸佢學吓用電郵同facebook。KK直言自己本身只係同網友就信仰交換吓諗法，但後來竟然成功用facebook幫市民處理個案：「有個六十幾歲嘅婆婆透過facebook同我講佢公屋唔養得狗嘅苦況，由於佢真係好需要隻狗陪伴支持，我就將單case轉介畀房署副署長，點知真係傾得掂。」
曾與網友約會
KK又自爆曾經好似「八十後」咁同網友「約會」，前後同網友單獨見面不下七、八次，大家最後亦成為好友。不過KK就同白鴿黨劉慧卿一樣倡議「和平理性非粗口」，任何喺佢facebook爆粗嘅網友都會被「記大過」，記足三次即刻要被「叮」出局。
講起facebook，大家不期然會諗起休會前表明要學習利用互聯網同打中文嘅白鴿黨。暑假就放完，佢哋嘅進展又如何呢？黨主席何俊仁同副主席卿姐嘅facebook睇嚟仍未算係活躍分子，仲似乎係由助理打理添，欠誠意咗啲喎。張文光尋日仲話自己唔會開facebook，事關覺得會畀人「左挖挖右挖挖」，冇晒私隱可言，佢又再三澄清佢係識得用「九方」打中文嘅，亦都教曉過唔少黨友，但笑言佢哋唔用功練習，唔係師傅問題喎！