中環出更：王守業夫人搵散紙狼狽
逛超市唔再係師奶專利，中環ifc高級超市city'super，經常見到名媛淑女身影。大新金融主席王守業夫人嚴君琴都鍾意幫襯呢度買生果，買橙之餘，又買車厘子，唔通超市有平貨執？非也，原來係為咗「唱散紙」。
早前一個星期日下午四點幾，梳咗個招牌髮型嘅王太獨自行超市，佢以白裙襯黑白間條上衫，再拎埋一個間條手袋，一身打扮襯到絕。超市貨品琳琅滿目，但王太獨沽一味鍾意買生果，車厘子正好係時令水果，眼前一盒售價約五十六元嘅美國車厘子顯得好吸引，一於買盒返屋企慢慢歎，再加多兩個澳洲橙，然後行去收銀處畀錢。
王太冇帶環保袋，畀完錢後索性將兩盒生果放入名貴手袋，步履輕盈地步向港鐵站櫃員機撳錢，正想攞提款卡之際，發現銀包被水果責住，望吓四周，想搵張枱放嘢都難，王太靈機一觸，將手袋放喺地下，踎低身摷銀包，睇落有啲狼狽。
剛由上海返港
撳完錢後，王太擰轉面，撞見卓妮擦身而過，興奮地分享上海見聞，原來佢參觀完世博，落機一刻打開銀包，先知冇散紙喺身，可惜四圍只有名店，於是行入超市買嘢「唱散紙」。卓妮見王太膚色曬黑咗，佢話，上海勁熱，好彩冇帶孫仔去。
卓妮