職工盟立法會議員李卓人啱啱喺日本返嚟，今次同亞太區其他工會代表一行十幾人，與日本首相菅直人開會。阿人話，今次得到日本方面禮待，菅直人仲花咗足足個半小時見佢哋一班代表，都咪話唔畀面喎。
講開又講，阿人去日本開會之前，原來同屋企人去咗印尼民丹島。話說阿人八月底去新加坡出席一個國際工會組織舉行嘅講座，見難得有機會，開完會後，帶埋老婆囡囡一齊去度假。不過阿人就一再重申，佢嘅來回機票係由主辦單位出錢，但老婆同個女嘅就自己科水。
民丹島雖然係印尼國土，但由新加坡去只需要四十五分鐘船程。阿人一家今次因利乘便去度假，嗰度水清沙幼，除咗留喺度假村休息外，又可以睇大象表演、行街購物。雖然咁多嘢玩，但阿人竟然話自己瞓足全程，似乎浪費咗啲喎。
