政情:何民傑叨鐵娘子光

經常示威抗議政府浪費公帑嘅「107動力」,前幾日獲英國納稅人聯盟邀請,出席喺倫敦舉行嘅第七屆納稅人會議。召集人何民傑喺會議上公布咗特區政府過去一年種種浪費公帑嘅情況,仲喺好多國家同地區代表面前,公開提及去年引起軒然大波嘅「慳電膽風波」添。

開咗三日會議後,主辦單位喺倫敦市大會堂設宴招待與會嘉賓,最特別嘅係連有「鐵娘子」之稱嘅前英國首相戴卓爾夫人都應邀出席。年近八十五歲嘅戴卓爾夫人在任期間,一直提倡削減公共開支同減稅,難怪一到場即時成為風頭躉。

何民傑都唔執輸,即時上前同戴卓爾夫人合照,事後仲發晒新聞稿畀本地傳媒公諸同好。本身係區議員嘅何民傑為咗「107動力」出錢又出力,講到底都係想出位啫,今次搵到機會同戴卓爾夫人合照,都算不枉此行,只係張相嘅質素差咗啲。

Money18新功能「18好路數」為你預測心水股票升跌機會率