政情：黎棟國唔得閒抱孫
上個月嘅菲國慘劇，牽動每個港人嘅心，有份幫手善後嘅保安局副局長黎棟國當然無得輕鬆，連再做爺爺，佢都未能即時去抱抱乖孫。尋日黎棟國同保安局局長政治助理盧奕基齊齊出席一國兩制研究中心有關珠三角發展嘅論壇，畀我哋「揭發」佢家有喜事，抱多個孫；不過佢面露靦覥神色唔多想講。佢解釋唔係有咩不可告人秘密，只係因為依家處理緊菲律賓事件，所以想低調處理家事，因此亦無咩點同人講。
今次造人成功等黎Sir有孫抱嘅，係喺澳洲嘅細仔Jimmy。Jimmy同太太本來已經有一個兩歲嘅囡囡Zara，黎Sir錫到佢燶。今次再生埋個孫仔，湊夠一個「好」字，做爺爺嘅又點會唔sweet呢？之不過咁，黎Sir依家為菲國事件忙到甩轆，處理慘劇嘅事點都緊要過湊孫，所以佢話現階段都仲未諗幾時過去澳洲抱吓隻老虎仔喎。