政情：馬雲變身未來戰士
阿里巴巴（01688）喺杭州舉行「網商節」，尋日請來美國加州州長阿諾舒華辛力加（阿諾）遠道而來擔任演講嘉賓，咁啱阿里巴巴主席馬雲前日（十日）生日，阿諾於是向馬雲送上一份遲來嘅生日禮物，就係佢喺《未來戰士》內嘅造型皮褸同型仔黑超。馬雲即場穿上皮褸同戴上黑超，隨即變成「未來戰士」，搞到阿諾搭住馬雲膊頭狂笑。
收阿諾生日禮物
其實阿里巴巴早前公布將喺加州創造十萬個職位，開辦一個以阿諾舒華辛力加為名嘅新世代企業家培育計劃，為當地大學生提供網上商家培訓，所以今次阿諾向馬雲送上生日禮物，可以話禮尚往來。尋日答問環節精彩萬分，身形瘦小嘅馬雲向身材魁梧嘅阿諾請教點樣可以操fit啲，阿諾好幽默話曾經寫過一本教人鍛煉健美體態嘅書，希望放上馬雲個網站上拍賣喎！
對於最近巴菲特等超級富豪提議死後捐出所有身家，培養子女自力更生嘅能力，馬雲就唱反調，批評話身家唔留畀子女，係不負責任行為。有人就關心唔係美國出世嘅阿諾無資格參選總統，阿諾都話好憎呢條法例，但唔會投訴，因為美國為佢帶來現今嘅名利和社會地位，相信喺其他國家發展嘅成功唔及美國十分之一。