中環出更：Ann蔣歐遊大蛋糕為父祝壽
暑假放完，政商名人陸續回巢，鄉議局主席劉皇發與蔣麗芸（Ann）兩位全國政協籌組嘅東歐豪華團，已順利完成十二日行程，盡興而返。遊覽捷克布拉格期間，適逢阿Ann嘅工業家父親蔣震八十七歲生日，阿Ann於是同媽咪、丈夫梁海明柯打一個方形大蛋糕為蔣老賀壽，團友就夾份送上一幅布拉格嘅風景油畫，蔣老笑逐顏開。
蔣震發叔iPad捉棋惹注目
發叔、發嫂、發叔女兒劉玉蓮及夫婿余漢坤，再加上阿Ann夫婦、蔣震夫婦及朋友等一行廿二人，先啟程遊覽捷克布拉格古城及Karlovy Vary溫泉區，然後再乘多瑙河遊船暢遊德國、奧地利、斯洛伐克及匈牙利，沿途風景如畫。據聞期間發生一件趣事，有團友帶部iPad去甲板與蔣震及發叔捉中國象棋，點知引來大批外國人圍觀，原來睇捉棋仲吸引過風景。
今次東歐之旅，原本阿Ann計劃到布拉格尋訪偶像作家卡夫卡（Kafka）故居，沾染吓卡夫卡嘅文學氣息，點知卡夫卡故居及坐落嘅街道裝修三個月，結果大失所望。不過，阿Ann笑謂一定係上天安排，要佢再去多次旅行喎！雖然阿Ann「朝聖」計劃失敗，不過遊奧地利期間有斬獲，買咗個奧地利女王Maria Teresa嘅瓷器公仔，唔使空手而回。