中環出更：王統元後人與馬會大董對親家

婚禮喺下午二時舉行，馬會前任主席陳祖澤、馬會現任主席施文信、馬會大董利子厚同行政總裁應家柏等馬會新舊話事人都早早到場，久違了嘅九鐵行政總裁詹伯樂同太太都有嚟觀禮。負責拖住囡囡進場交畀新郎哥嘅布魯士，坦言心情緊張。咁啱前晚跑夜馬，呢位笑住大呼緊張嘅新外父，都不忘幽自己一默，話嗰晚唔使入馬場，慳番好多。

至於做戥穿石嘅英皇集團主席楊受成大仔楊其龍，前日亦一早到場打點，佢話同新郎哥識咗廿幾年，所以今次做埋戥穿石。做咗好多次戥穿石嘅佢，話唔擔心娶唔到老婆喎。

馬王培琪單拖赴會

晚宴酒會六點半開始，賓客們成雙成對到賀，啱啱卸任馬會主席嘅陳祖澤同太太孖住嚟，大董葉錫安伉儷、周永健伉儷、利子厚同低調戀人何明懿等全部雙雙對對出席，向來有影皆雙嘅大新銀行主席王守業同前立法會秘書長馮載祥伉儷亦一早嚟到，連社交場合嘅稀客、終審法院首席法官馬道立都同太太嚟飲。不過，身為王家親戚嘅馬王培琪就單拖嚟，睇怕佢個愛妻號老公馬時亨嗰晚應該好忙。

講開又講，卓妮覺得今次嘅晚宴好有特色，酒會先有中式古箏演奏，晚宴就由蘇格蘭風笛隊揭開序幕，中西合璧，好切合一對新人華洋共處。

每張枱又用好sweet嘅詞語做枱號，好似I do（我願意）、Sweetheart（甜心）、Promise（承諾）、Loyalty（忠誠）等等，睇嚟都係一對新人嘅由衷之言。

馬時亨太太王培琪單拖嚟，一樣開心。	丁午壽伉儷唔知有無向新人傳授相處之道呢？	利子厚（右）同何明懿拍拖到賀，認真畀面。
上海紡織大王王統元嘅兒子王趯霖娶新抱，男家傾巢而出賀新人。 （葉華英攝）	楊其龍同新郎廿幾年老友，做戥穿石適合不過。