政情：章啟月初到印尼搭錯線
前國家外交部發言人、現任駐印尼大使章啟月近日應港府邀請到咗香港訪問，尋日佢應中文大學邀請主講講座，內容主要圍繞中國嘅外交政策以及中國同東盟嘅關係，中大校長沈祖堯仲代學生向佢發問，點樣至可以成為成功嘅外交家。
章啟月話，外界對印尼其實好多誤解，佢上任之初都誤會印尼係一個伊斯蘭國家。佢自爆，自己上任之初曾經去王宮會見印尼總統，由於以為係伊斯蘭國家，所以選擇着包到上頸嘅旗袍，外面再加件外套。點知接待嘅官員同佢閒談時主動建議佢除咗外套，話咁樣會更有傳統美。章啟月大為驚訝，後來先知道印尼只係大部分人信回教，而非正式嘅伊斯蘭國家，又明白咗呢個國家其實十分多元化。
中大校長沈祖堯尾聲時盛讚章啟月口才了得，講成粒鐘都唔使睇「貓紙」，代學生問佢有乜成功方法；章啟月好客氣話，自己冇乜成功秘訣，不過希望大家可以放眼世界，認識鄰國國情，加上努力工作，唔好故步自封，咁每個人都可以做代表中國嘅大使喇。