政情：自由黨又請葉劉食檸檬

山頂選區以前係自由黨地盤，前主席田北俊九九年當選區議員○三年交棒黨員林文傑，惟○七年被公民黨陳淑莊挑戰成功，老巢失陷。政改方案六月底塵埃落定，區議會超級議席成為政壇筍盤，唔少明星級政治人物都想分一杯羹，但要先取得直選區議員嘅入場券，當時葉劉先聲奪人，揚言有意競逐超級議席，而且區選一關正正就係出戰山頂選區，硬撼陳淑莊。其實自由黨呢個舊巢，葉劉一年前已到實。

踢爆一年前曾叩門

Miriam尋日證實，葉劉一年前問過佢，自由黨會唔會派人競逐一一年區選山頂選區，Miriam當時表明，地區幹事陳浩濂已喺該區經營兩年，自由黨唔會打退堂鼓。即係話，葉劉食咗Miriam檸檬。

一年前政改方案仲未出爐，無人有水晶球預見區議會「超級議席」橫空出世，葉劉當時睇中山頂選區，估計想借明年區選硬撼陳淑莊，製造戲碼，催谷人氣，為翌年立法會直選造勢鋪路。政改後多咗超級議席，葉劉對山頂選區更加志在必得。消息指，匯賢智庫輸掉薄扶林區議會議席，葉劉對明年區選甚至一二年立法會區議會超級議席，雄心未減，打算再叩自由黨門，尋求協調山頂選區。

尋日問葉劉，佢話自由黨喺山頂選區有相當實力，○七年只輸陳淑莊一百餘票；若然明年無自由黨讓路，佢出戰山頂選區不切實際。言下之意，默認想自由黨成全佢嘅參選大計。不過，問到有傳佢會再向自由黨敲門，葉劉就賣關子，話薄扶林補選剛結束，要放假叉電，稍後才會認真考慮咁話。

葉劉對參選明年區議會用意明顯，但即使佢再向自由黨探路，估計都係再食多一次檸檬居多，事關有傳田少至今未排除代表自由黨競逐超級議席，若然成事，好大機會會取代陳浩濂重返山頂選區出戰。自由黨如此布局，葉劉仲邊有機會？