中環出更：阿寶自爆做過邊青
「單車王子」黃金寶同師弟郭灝霆齊齊喺教育學院開學，入讀今年第一屆開辦嘅健康教育（榮譽）學士課程，將來服務學童、青少年、成人同病者等不同社區。阿寶已經丟低咗個書包成廿年，加上預計可能要兩年後先正式退役，半「輪」讀嘅生涯對阿寶嚟講都係幾大嘅挑戰。不過讀書係智者之選，阿寶揀得再做學生，當然經過深思熟慮，相信佢要戴四方帽都絕非難事。
望身教濫藥青年
家中排行第六嘅阿寶，家有七兄弟姊妹，所以小時候無王管，阿寶自嘲嗰時係邊青，事關無心向學之餘又掛住玩同踩單車。阿寶話佢修讀呢個課程就係希望可以增強學歷，將來服務青年同老人，因為佢好關心青年濫藥問題，希望可以用運動員嘅健康精神，以身教輔導年輕人唔好走向歧途。
阿寶身經百戰，相信讀書同輔導都一樣難佢唔過，加上學校有視像系統，可以幫到未必日日返到學嘅阿寶學習，當然到咗考試日就一定要現身啦，阿寶手車咁快，到時唔怕會遲到。