中環出更：夢露至愛香水肥亨一索鍾情
香水散發神奇魔力，令女士迷醉，男士暈浪。幾乎每位名媛淑女都有一支Chanel No.5，呢支「香水中的經典」，連中策集團主席馬時亨都心動買番支。肥亨一「索」就愛上佢，前後不過三分鐘，就花費逾千元一親No.5香澤！
1921年推出嘅No.5，多次被選為女士心中「最佳香水」。肥亨買嘢前做足功課，早前一個星期五，佢行入中環太子大廈Chanel專門店時，一嚟就揀香水。嗰陣係黃昏五點幾，店內客人唔算多，店員攞出幾支鎮店之寶，噴喺試紙上遞畀肥亨，肥亨插住褲袋試味，甫士都有型過人。
「幫朋友買嘅」
「索」咗幾吓後，店員順便推介埋另一支新鮮出爐嘅男裝香水，但肥亨「索」咗兩啖就皺眉，睇嚟陣味唔係佢「飛佛」。諗咗三分鐘，肥亨還是覺得No.5最正，一買就買最大size嗰支，售價一千二百五十五元。肥亨連卡都費事碌，畀cash找數。
奇怪，堂堂一個大男人，點解會買女裝香水？莫非買嚟氹太太？肥亨喺門外撞見卓妮，笑騎騎解釋：「支香水唔係買畀太太，係幫朋友買嘅。」幫邊個朋友買？佢就話唔方便講嘞。仗義幫朋友，都算唔話得。
講番Chanel No.5，香味獨特，連性感女神瑪莉蓮夢露都視佢為睡前唯一會「穿」的東西。經歷唔同年代，女士還是對佢神魂顛倒。將No.5噴喺不同女士身上，據聞仲會散發不同香味，或者呢個就係No.5嘅成功所在。
卓妮