政情：維園開壇謝志峰惹火

珠姐自爆被迫甩底

尋日建制派繼續杯葛《城市論壇》，謝志峰不禁大呻近半年嘅論壇畀民建聯搞到「跛晒腳」。台下嘅譚惠珠聽到當然唔高興，仲刻意表明自己係民記成員，足以代表民記出席，佢又自爆自己逢請必到，唯獨有一次因佢掌握到啲機密資料，知道政改方案會「轉彎」，所以先唔嚟。珠姐講緊嘅係立法會表決前形勢急轉直下嘅區議會方案，佢呢頭至講緊個方法一山藏六虎，所以唔理想，嗰頭各方又已經傾掂數，要佢忽然轉軚支持方案實在難為咗佢，所以佢被迫甩底亦情有可原。

發展局局長林鄭月娥都話，多年來佢都多次出席呢個節目，淨係做庫務局常秘都嚟過三次，○三年做社會福利署署長嗰陣又嚟過講沙士，不過最惹火嗰一次，無疑就係傾皇后碼頭問題嗰次嘞。

尋日嘅論壇討論言論自由，廣播署長誓神劈願咁話，編輯自主好似佢條命咁重要。

民主黨副主席劉慧卿（右）最關心嘅，係叫人喺節目裏面唔好講粗口，左為自由黨主席劉健儀。

廣播署長黃華麒話，編輯自主一如佢嘅生命咁重要。