政情：吳文華招募試食兵團
立法會新大樓明年入伙，新大樓比起現時嘅立法會大樓多咗好多設施，樣樣都精益求精，但對公私兩忙嘅議員嚟講，真正用得着嘅，其實係餐廳，關乎議員口福同健康福祉。為揀出最好嘅餐廳承辦商，立法會秘書長吳文華（Pauline）計劃成立一支「試食兵團」，請當然用家即係議員試菜。立法會議員乜都拗餐死，而食嘢嘅口味人人唔同，要達共識都唔容易。
依家立法會有宴會廳，每逢星期三開大會，都有到會自助餐供應，只限議員享用，但服務限時限刻，又要預約，所以，議員有時索性貪方便叫外賣，或者出街食。日後新大樓保留宴會廳外，仲設有餐廳，議員食飯唔再限時限刻，所以邊間餐廳咁榮幸可以賜議員飲食，就要各出奇謀喺試菜階段得到議員嘅好印象。
Pauline打算成立一支「試食兵團」，搵識飲識食嘅議員試菜，考驗投標者大廚嘅功力。立法會餐廳關乎議員口福同健康，「試食兵團」人選絕不能求其，最好八黨都有代表啦，唔得嘅話，漁農界黃容根同飲食界張宇人（Tommy）亦應列入當然委員，以二人嘅「重量級」身形，唔食得都睇得嘛。
清淡Vs好味 各有支持者
「老饕」根哥對食已昇華到無欲無求嘅境界，話揀選餐廳，首重健康，菜餸最緊要食材新鮮同易消化，仲話餐廳嘅雞最好用走地雞，咁先至味道同營養兼備喎。保險界陳健波就從人壽角度着眼，認為議員平日無時間做運動，餐廳煮法首要清淡為主，少肉、少油、少鹽，兼多菜、多魚，咁就very good嘞。
不過，身為餐飲業代表Tommy，就有唔同睇法，直言健康煮法，出品通常都無咁好食，少鹽少油，全部白烚，搵鬼幫襯，從業界角度，等如趕客，呼籲同僚放業界一條生路。不過，Tommy表明，唔會加入試食兵團，事關投標者個個都係選民，無謂順得哥情失嫂意。
Tommy係飲食界專業人士，佢嘅意見當然重要，例如佢建議喺宴會廳設魚池，等議員有海鮮送飯，仲有就係餐廳出菜嘅位置同收碟嘅入口要分開，咁先至夠衞生。