中環耳目：鹹魚送白粥李妮好滿足
「阿一鮑魚」老闆楊貫一嘅富臨飯店係老饕朝聖熱點，上周卓妮見到前亞洲小姐冠軍李妮（Lily）喺度食午飯，原來富臨都係佢嘅私人飯堂，不過Lily唔係嚟親就食鮑魚，一碗入口綿滑嘅白粥配埋香味四溢嘅鹹魚已經好滿足。
Lily近年好少公開露面，佢已結咗婚，又同朋友一齊做澳洲有機護膚產品入口生意，仲有餘力做埋慈善公益，依家係博愛醫院嘅總理，不愧係美貌、智慧同埋愛心兼備。
富臨以鮑魚聞名天下，Lily話，如果請客梗會點鮑魚，不過若係自己嚟食就鍾意清淡啲。當日佢叫咗煎馬友鹹魚送白粥，再加埋一煲至愛嘅蝦乾雜菜煲，夠晒惹味。