中環出更：馬季開鑼馬主各出奇謀
鑼聲一響，馬季正式開鑼。今季馬圈有新氣象，由鬼馬風趣嘅施文信上任做馬會主席。人事唔同咗，但馬迷照樣「馬照跑」。廠商會副會長施榮懷率先飲頭啖湯拉頭馬，捧走廿八萬五千元獎金。唔少馬主磨拳擦掌部署新季戰略，馬會大董兼馬主利子厚購入新馬並改名「擦出火」，前全國政協常委張永珍都替新馬取咗個勁名，叫「頭等艙」。
馬迷「餓馬」多時，尋日爭入沙田馬場攞頭彩，連稀客新世界發展董事總經理鄭家純都嚟湊熱鬧，為愛駒「奪寶」打氣，「奪寶」賽前狀態神勇，純官當然唔想錯失拉頭馬機會，可惜「奪寶」僅跑第三，純官走時顯得有啲失望，但佢表現出大將風度話：「（隻馬）表現都OK，跑馬唔係講輸贏嘅。」首個賽馬日就開齋袋錢，成績算唔錯喇。
施榮懷旗開得勝
施榮懷家族旗下嘅「愛拼者贏」尋日以大熱姿態脫穎而出。攞到頭彩，施生興奮地豎起拇指話：「最緊要係旗開得勝。」夜晚同家人食飯慶祝。
新馬季將有唔少新馬亮相，利子厚預告愛駒「擦出火」已積極操練，就快登場。齋聽「擦出火」個名，戰意味濃，名字由來源於一餐飯。話說利子厚有次同朋友食西餐，講起為新馬改名，見到枱上有一種名叫Tatuffo嘅黑菌，靈機一觸用「Tatuffo」做馬名，然後取其諧音「擦出火」喎。
張永珍都絞盡腦汁為新馬改名，最後扑錘用「頭等艙」，莫非張大姐好鍾意坐頭等？非也！原來頭等艙有最頭最前嘅意思，希望愛駒跑得快過人，贏多啲頭馬喎。
卓妮轉頭撞見已卸任嘅前主席陳祖澤，John陳對馬圈不離不棄，入場行番轉，問佢落注會否比做主席時更豪氣，佢就笑住快步走，似乎唔想搶新主席施文信風頭。
卓妮