政情：單雞長揸台股唔放
自從冇做立法會議員後，白鴿黨副主席「
雞」單仲偕更積極炒股，變咗「白鴿股神」。早前講過佢睇好台灣股市，透過買基金買入台股，依家仲話回報唔錯添，但佢點都唔肯講回報有幾多，只係話會長揸。
白鴿股神點解對台股咁有信心呢？雞係香港政壇中人，睇台股走勢都拉扯到兩岸關係同台灣政局。啱啱跟多名黨友去完台灣考察嘅雞話，早前陳水扁做總統時，經濟差到貼地，台股沉咗咁耐，依家可望穩步上揚。再講，雖然總統馬英九畀人鬧得咁交關兼民望低，喺嚟緊嘅市長選舉，估計國民黨候選人仲可能輸三至四席，雖則係咁，台灣人有一種特性，就係呢次支持某一個黨，好快又會轉軚，下次支持番啲弱勢政黨嘅候選人，所以政局唔會好亂喎。
雞好有信心話，政局穩定有利經濟發展，兩年後係台灣總統選舉，近年兩岸吹暖風，相信大陸都會撐馬英九，再加上陳水扁單case拖到依家都未判，分分鐘等到總統選舉先宣判，呢段時間內台股應該向好，所以佢依家揸住啲台股點都唔放，起碼揸到總統選舉喎，信唔信由你！