政情：青少年網站改版勁老土
青少年就業出路、買樓上車等問題，對政府嚟講都係燙手山芋，主要官員早前不止一次講過要同班八十後、九十後多啲溝通。政府嘅青少年網站尋日正式推出全新主頁，政府新聞處嘅新聞稿話，今次改版完全係為咗緊貼青少年口味，同時亦為青少年提供更便捷平台。好可惜，睇完個設計之後大家就會明白，港府係幾咁老土同失敗。
呢個網站設計色彩都算斑斕，可惜仍然走唔出政府網站「四四正正」嘅設計模式，網頁編排過於整齊，用喺正式政府網站當然恰當啦，但既然講明係青少年網站，咁嘅設計未免失色，更加講唔上有吸引力啦。政府面對嘅青少年問題，歸根究柢就係喺官僚系統下，與時下年輕人溝通不足，無法從後生仔角度出發去思考問題，社會先至會咁多矛盾。為青少年設計網站概念雖好，但卻跳唔出框框，最後只係得個吉！
新聞處矇查查出錯
順帶一提，新聞處嘅新聞稿將網站其中一欄「今日熱點」寫成「今日焦點」，政府部門連想宣傳嘅網站內容都未搞清楚，試問又點吸引其他人去睇呢？