政情：騎呢訪滬 副局政助集體「消失」
劣評如潮兼屢爆醜聞嘅十八名副局長同政治助理，最近因獲政府凍薪，變相唔使為不濟表現承擔後果，激起社會更大反彈。政府可能想沖喜，尋日公布呢班政治新丁喺嚟緊周日（五日）起一連四日訪問上海，考察團由特首辦主任譚志源（Raymond）帶隊，反映Raymond譚嘅「校長」地位屹立不倒。政府擺空城計，成隊副局政助走咗去都得，證明呢班政治新丁嘅存在可有可冇，咁不如炒晒佢哋啦！
繼星期三失驚無神公布政務司司長唐英年即日往返北京嘅「條條fing」一日遊後，政府尋日傍晚又有一則古靈精怪嘅行程公布話，應國務院港澳辦邀請，有十六位副局同政助喺九月五日至八日訪問上海，將與上海市有關部門進行工作交流，了解上海嘅規劃，仲會參觀上海市建設同世博。講白啲，即係使公帑遊上海。新聞稿指，是次考察旨在加深副局政助對上海發展嘅了解，促進兩地嘅交流合作喎。
Raymond譚今次要做湊仔公，擔任團長帶隊，帶住成班鴨仔遊上海。十八位政治新丁中，教育局政助楊哲安同「坡妹」財經事務及庫務局政助伍潔鏇無法同行，二人咁啱都係同生ＢＢ有關，楊哲安同女藝人太太張燊悅嘅第二個愛情結晶品就快出世，呢段日子要陪伴在側，而伍潔鏇幾個月前誕下第三個ＢＢ，唔方便遠行。
形象插水 沖喜反露底
呢個副局政助上海團都幾騎呢，副局政助嘅工作同上海有幾大關係，考察行程係咪確有需要暫且不講，成支中下層政治任命團隊北上四日，等如集體放假遊埠，咁嘅安排，已經相當罕見。所謂「天有不測之風雲」，如果嗰四日特區發生重大事情，咁啱又有局長唔喺崗位，成班副局長離港，署任安排點處理呢？保安局副局長黎棟國同食物及衞生局副局長梁卓偉，正負責參與菲律賓人質慘劇嘅善後工作，呢個時候離港，又係咪適當時機呢？
特區政府寧冒政治風險，都安排副局政助訪問上海，睇怕同「凍薪」一役有關，事關十八個副局政助備受抨擊，形象進一步插水，惟有搵啲軟性新聞，幫佢哋沖沖喜兼軟銷一番。不過，政府可能打錯算盤，皆因今次騎呢訪滬，反而被公眾清楚睇到，喺政府高層眼中，即使副局政助全體「消失」，對政府運作不見有實際影響；既然可有可冇，點解仲要嘥咁多錢留佢哋喺度？睇怕以後社會要求炒副局政助嘅呼聲會愈嚟愈大。