中環出更：棋哥「老友多」自嘲球技差
前晚香港工業總會舉行成立五十周年金禧晚宴，城中名人高官踴躍捧場，半世紀前有份做創會會員嘅全國政協常委陳永棋梗要去撐場啦！今年暑假香港天氣熱到飛起，棋哥識得享受人生，去澳洲探望寶貝女兼避暑，順便陪太太去打高爾夫球，仲笑稱佢負責幫太太執波。企喺一邊嘅食物及衞生局常任秘書長李淑儀，聽到之後好唔抵得佢，笑問：「幫太太執波？幫自己吖嘛？」
原來棋哥同李淑儀係「同學」，兩人曾經一齊去澳洲學打高爾夫球，講起打波自然話題不絕。但棋哥好客氣咁自嘆球技麻麻，講講吓，立法會議員「IQ博士」黃宜弘行過，棋哥即刻將焦點轉移到佢身上，讚IQ博士好好波，試過打出七十二桿標準桿嘅佳績，跟住話：「我啲老友就返晒嚟啦」！
IQ博士傷腰就住打
原來高球圈中友流傳一句說話：「一百波，老友多」，即係打得差啲先至有朋友一齊打！聽到棋哥咁謙，IQ博士都唔敢認叻，回贈話自己嘅老友都返晒嚟，事關自從佢早前傷咗條腰之後，醫生叫佢打高球時唔好去得太盡。以前佢開波可以開到二百六十米，依家只得一百八十米咋！
卓妮