中環出更：廿四孝陳振彬帶家人遊塞納河
政商界名人輪流放暑假外遊，好似青年事務委員會主席陳振彬（Bunny）就做廿四孝爸爸，上月同太太帶埋兩個囝囝到法國旅行，先喺巴黎玩四日，然後上遊船暢遊著名塞納河及諾曼第多個城區。Bunny今次一改過往旅行模式，無帶工人去湊仔，自己同太太一人照顧一個仔，盡情享受親子樂趣。佢話最開心係每晚同囝囝沖涼！
八月嘅歐洲天氣最好，Bunny話法國陽光普照，平均氣溫只有廿三度，仲有陣陣微風吹送，佢哋一家四口喺羅浮宮對出草地Hea足兩小時，小朋友跑跑跳跳，玩得好開心，期間又登上著名嘅艾菲爾鐵塔，眺望戰神廣場公園。喺巴黎玩咗幾日後，就登上塞納河遊船，分別到Giverny參觀凡爾賽宮殿、Les Andelys嘅堡壘、Rouen嘅諾曼第海灘、藝術之都兼古老漁港Honfleur等。
塞納河遊船可載八十人，每日停靠二至三個城區，讓遊客上岸參觀。遊船首晚安排咗客人喺船頂享用露天豐富晚餐，一邊食一邊欣賞巴黎鐵塔嘅璀璨燈飾，但最有趣嘅係，Bunny話遊船一入到巴黎範圍，遊船就會收起船頂，叫客人坐低，因為遊船高度僅僅可通過橋樑，舉高手仲可觸摸到橋樑底部添。
古老漁港 鯉魚門借鏡
整個遊船行程中，Bunny較深刻係遊覽Honfleur，佢被當地優美環境深深吸引，身兼觀塘區議會主席嘅佢，正好為鯉魚門旅遊發展取經攞靈感。由於今次Bunny無帶工人去法國，所以佢兩個囝囝好掛住屋企幾個工人，特登買咗幾個甜桃返去做手信，點知放喺背囊內焗到熟晒，部分仲壓爛咗，搞到好唔開心。難得小朋友咁有心，幾個工人安慰兩個小朋友，話無得食都無所謂喎！
卓妮