中環出更：黃進達愛Omega鋼錶沉實襟撞
康泰旅行團上周一浴血菲律賓馬尼拉，康泰旅行社太子爺黃進達（Jason）喺旅遊界一片愁雲慘霧之中，尋日正式接替劉美詩上任董事總經理一職，挑起康泰嘅重擔。Jason性格內斂和謙厚，佢佩戴嘅腕錶款式同性格都係同出一轍，鍾情Omega Seamaster嘅Planet Ocean（海洋宇宙），貪呢款錶夠大隻、夠沉實，仲好襟撞添！
黃士心鍾情百達翡麗
Jason隻Omega戴咗幾年，係佢自己賺錢購買嘅第一隻腕錶，當年盛惠三萬多元，至今經常戴住去打籃球同潛水，全天候陪伴左右。呢款錶咁襟用，皆因錶殼以精鋼製造，錶面為圓弧形抗磨損藍寶石水晶鏡面，六百米防水，並設有排氦氣閥門減壓系統，啱晒經常到外地開闢潛水熱點嘅Jason。
Jason戴錶咁沉實，相反佢爸爸黃士心就唔貴唔戴，手上嘅名錶為稀有嘅百達翡麗，錶面鑲有青金石及鑽石，而且大大粒，二十幾年前喺拍賣會以三萬多元競投所得，至今已大幅升值，耐唔耐攞出嚟欣賞吓，確係賞心樂事。
卓妮