政情：劉千石笑對「平反」
政改通過，關鍵一步係民主黨同中央政府喺談判過程中各讓一步，諗番轉頭，前立法會議員劉千石○四年倡議「大和解」論實在有先見之明，如果歷史時序稍為更改，○八年立法會選舉喺今年九月先舉行，九龍西戰果隨時改寫。
「大和解」曾遭抨擊
阿石已淡出政壇，鮮有公開露面，佢○八年選舉落敗後自爆直腸癌復發，令人更關心佢嘅近況。尋日臨時最低工資委員會見記者，交代已就首個最低工資水平達成共識，身為委員嘅阿石都有現身，只見久違嘅佢精神飽滿，神采更勝往昔。信教嘅佢話，多謝上帝祝福，一切平安順利，平日除穿梭香港與上海療病，亦會上廣州聽粵曲同唱戲，生活充實。
阿石六年前倡議泛民同中央「大和解」，當時被以民主黨為首嘅泛民猛烈抨擊，政改方案通過後，社民連「長毛」梁國雄就要求民主黨還阿石一個公道。阿石尋日提起「平反」一事，哈哈笑咗幾聲，話：「要講嘅，當年都講晒喇。」一啲都冇拖泥帶水。