政情：鬍鬚曾懵盛盛中冷箭

鬍鬚曾訪問台北進入第三日，來到此行重頭戲，以港台經濟文化合作協進會榮譽主席身份，同台方嘅「策進會」高層會面，展開首次聯席會議，陸委會主委賴幸媛亦有出席，港台兩邊最高負責人碰頭，即高下立見。

身為東道主嘅賴幸媛先上台致辭，由香港電影《十月圍城》中孫中山喺香港密謀革命嘅事迹講起，將香港同台灣嘅感情線連結起嚟，再綜述過去一百年台港關係嘅曲折發展，整篇講詞，恢宏有策略。相比之下，緊接發言嘅鬍鬚曾，全份講稿都係官樣文章，陳腔濫調，沉悶到暈。

最有趣嘅係，賴幸媛喺致辭尾聲，綿內藏針，插上一段介紹台灣官方喺過去一年，為利便台港民間交流所作過嘅努力同具體措施，然後，話對聯席會議「有着深切的期許」，曲線催逼港府「起錨」做嘢。大家估吓鬍鬚曾有乜反應？就係：無反應！佢上台笑笑口，一字一句讀完手上嘅官腔致辭就收工，都唔知佢到底係唔識點反應，定係根本連人家寸緊佢都聽唔出？

面對記者講廣東話

鬍鬚曾對住台灣官員懵盛盛，開完聯席會議後面對記者，一樣懵懵懂懂。由於特區司長同陸委會主委首次碰頭，台灣各大傳媒蜂擁而至，但鬍鬚曾出席記者簡報會，竟然以廣東話讀開場白，跟住全程九成時間都係回答香港傳媒提問，單聲道廣東話交流，聽到旁邊台灣傳媒一頭霧水。

鬍鬚曾訪台，主要目的係促進港台經濟及文化交流，推銷對象理應以台灣傳媒為主，就算鬍鬚曾「煲冬瓜」唔掂，都唔應該斬腳趾避沙蟲，一味用台灣傳媒聽唔明白嘅廣東話嚟交流，簡直係促進港台交流嘅反面教材。