中環出更：群醫宴賀金刀梁榮獲「大紫荊」

金刀梁喺醫學界門生多不勝數，尋晚唔少名醫紛紛到賀，包括前教統局局長李國章、前醫管局行政總裁何兆煒伉儷、港大內科學系榮休教授楊紫芝、中大醫學院院長霍泰輝、食物及衞生局副局長梁卓偉，仲有為腦部重創梁頌學治療嘅屯門醫院腦神經外科部門主管方道生。搞手高醫生笑言，金刀梁獲授勳消息出街後，幾乎晚晚有老友請食飯，為免梁醫生冷落嬌妻，倒不如一次過慶祝。

老婆救過李麗娟

主角金刀梁入場先知有驚喜，佢話起初以為擺一、兩圍，嚟到先知咁多人，佢high到滿場飛同嘉賓影相。高永文知道師傅愛吃潮州菜，點咗凍蟹、花膠燉螺頭湯、蠔仔肉碎粥等。成班名醫仲夾份送咗部最潮嘅iPad賀金刀梁。梁太馮令儀好有心思，親手自製三百五十份四葉草鎖匙扣答謝賓客。

前民政事務局常秘媽打李麗娟係金刀梁夫婦多年嘅老友，仲話梁太係佢救命恩人。話說九六年發生八仙嶺大火後，媽打突然感到胃痛，高醫生深知不妙，提議佢入瑪麗醫院檢查，幫佢做掃描嘅醫生，就係瑪麗放射科部門主管梁太。一照之下，發現媽打原來生咗個八厘米大嘅腎上腺瘤，及時做手術救回一命。媽打話，個瘤好難照，少啲經驗都唔得，幸好遇到梁太出手，所以尋晚除咗嚟賀金刀梁授勳，都要再三多謝恩人一聲喎。

李麗娟（左二）話梁太（左）係佢恩人，右一、二係醫管局主席蘇利民同Uncle Ray。	方道生（中）忙裏偷閒恭賀梁醫生，右為梁卓偉。	名醫聚首恭賀梁智鴻，右起梁卓偉、楊紫芝、何栢良、梁家騮、李國章和高永文等。 （伍鎮業攝）

卓妮