政情：韓東方 黃文軒做白鴿
白鴿黨支持政改後，畀激進派批評出賣民主，立法會議員鄭家富仲退埋黨以示大家路線不同。不過，「有人辭官歸故里，有人漏夜趕科場」，白鴿黨尋日高調舉行迎新會晒冷，副主席單仲偕（
雞）仲話政改前後有廿一人遞表入黨，包括前工運領袖韓東方、投資銀行家張雄峰、立法會議員黃成智愛兒黃文軒，仲有個前社民連成員添。
雞話，依家白鴿黨有七百六十幾個黨員，創咗近年新高，佢對未來壯大白鴿黨非常有信心，目標係半年內黨員人數突破一千大關。咁點吸引人入黨呢？白鴿黨已經有幾個大計，首先從宣傳入手。除咗靠本身黨員去呼籲人入黨，白鴿黨仲計劃透過搞社區藝術，吸引多啲年輕人參加白鴿黨活動，順便睇吓可唔可以吸人入黨。白鴿黨青年事務委員會仲會進行改革，變成直屬中委嘅「民主青年」，當中核心成員除主席外，非民主黨成員都可以入會，相信會吸引一班對政黨反感嘅青少年加入。人人都話要年輕化，唔知白鴿黨又有幾大誠意呢？